Худалдаа, үйлчилгээний байгууллагын ажилтны урьдчилан сэргийлэх үзлэг, шинжилгээний дэвтрийг цахимжуулах ажил дуусаж 2025 оны 11 дүгээр сарын 14-ний өдөр нээлтийн арга хэмжээ Чингэлтэй дүүргийн нэгдсэн эмнэлэг дээр Нийслэлийн Эрүүл мэндийн газрын даргын албан үүргийг түр орлон гүйцэтгэгч Б.Батцоож, Эрүүл мэндийн хөгжлийн төвийн захирал М.Одгэрэл нар нээж, асуултад хариуллаа. 
Урьдчилан сэргийлэх үзлэг, шинжилгээнд Эрүүл мэндийн сайдын 2017 оны А/145 дугаар тушаалын дагуу зөвхөн нийслэлийн хэмжээнд идэвхитэй үйл ажиллагаа эрхэлж буй хүнс, худалдаа, үйлдвэрлэл, үйлчилгээ, зочид буудал, боловсрол, эрүүл мэндийн байгууллага зэрэг 12 чиглэлийн ажил, үйлчилгээ эрхлэгч 20600 гаруй байгууллагын 130,000-150,000 орчим ажилтан, албан хаагчид жилд 2 төрлийн үзлэг, 4 төрлийн шинжилгээнд 1-2 удаа хамрагддаг.
“Алсын Хараа 2050” Монгол Улсыг хөгжүүлэх урт хугацааны бодлогыг баталсан бөгөөд тус хөтөлбөрт “Сайн засаглал”-ыг бий болгох зорилгын хүрээнд ухаалаг засаглал, ухаалаг бүтэц, цахим монгол – иргэн, төр хувийн хэвшлийн нэгдсэн системийг бий болгохоор заасан.
Иргэдэд үзүүлэх төрийн үйлчилгээний хүртээмжийг нэмэгдүүлж, төрийн байгууллагын ачааллыг бууруулах ажлын хүрээнд эрүүл мэндийн байгууллагаас олгодог урьдчилан сэргийлэх үзлэг, шинжилгээний дэвтрийг Цахим хөгжил, инновац, харилцаа холбооны яам, Нийслэлийн Эрүүл мэндийн газар, Эрүүл мэндийн хөгжлийн төв, И-Монголиа академитай хамтран цахимжууллаа.
Уг урьдчилан сэргийлэх үзлэг, шинжилгээний дэвтэр /иргэдийн нэрлэж заншсанаар “Цагаан дэвтэр”/-ийг цахимжуулснаар иргэд, аж, ахуйн нэгжид дараах эерэг үр дүн гарна:
- Иргэн та тухайн шинжилгээний хариу гарсан даруйд ИМонголиа системээр шинжилгээний хариу, дүгнэлтээ авна. Ингэснээр иргэд биечлэн очиж хариу, дүгнэлтээ авах шаардлагагүй болж цаг хугацааны болон санхүүгийн хэмнэлт хийнэ.
- Иргэн та өөрийн үзлэг, шинжилгээний түүхээ гар утас, компьютероос хялбар харах боломжтой болно.
- Иргэн таны цаасан дэвтэр алдагдах, гэмтэх зэрэг эрсдэл байхгүй болох олон давуу тал бий болж байна.
- Хоолны хордлого, халдварт өвчнөөс урьдчилан сэргийлнэ
Төрийн байгууллагад дараах эерэг үр дүн гарна:
- Цагаан дэвтрийн үзлэг, шинжилгээний гараар бичилт хийх үйл ажиллагаа байхгүй болж бүртгэл, тайлан цахимаар гарч цаг хугацаа хэмнэн эмч, эмнэлгийн ажилчдын ажлыг хөнгөвчилнө.
- Эмч өмнөх үзлэгийн хариу, эрсдэлийг харьцуулан эрт оношлох, зөвлөгөө өгөхөд дөхөм болно.
- Үзлэг шинжилгээний хариу, дүгнэлтээ авах гэсэн иргэдийн давтан ирэлт байхгүй болж эмнэлгийн үзлэгийн ачаалал буурна.
- Цахим мэдээллийн нэгдсэн сангаар дамжуулан урьдчилан сэргийлэх үзлэгийн хамрагдалт, өвчлөлийн түвшин, нас хүйсийн бүтэц зэрэг үзүүлэлтүүдийг шууд гаргах боломж бүрдэнэ.
- Худалдаа, үйлдвэрлэл, үйлчилгээний байгууллагын ажилчид урьдчилан сэргийлэх үзлэг, шинжилгээнд хамрагдсан эсэх, эрүүл ахуйн шаардлага хангаж байгаа байдалд улсын байцаагч хяналт тавих боломж, бодит байдал сайжирна.
-
Цаашид жолоочийн, ажилд орох ажилтны, гэрлэх хосын болон галт зэвсэг эзэмших иргэдийн урьдчилан сэргийлэх үзлэг, шинжилгээг цахимжуулахаар зорин ажиллаж байна. Түүнчлэн уг цахимжуулах ажил хийгдэж дууссанаар улсын хэмжээнд урьдчилан сэргийлэх үзлэгийн бодит мэдээлэлд тулгуурласан эрүүл мэндийн бодлого боловсруулах суурь нөхцөлийг бүрдүүлэх юм.
